Biography of Quaid-E-Azam Muhammad Ali Jinnah In Roman Urdu

Quaid-E-Azam Muhammad Ali Jinnah

(Biography)

Ibtadai zindagi / Initial life

Babe islam sindh ke mashor shehar Karachi me Monday ke din (Sunday nahi jesa k amoman kitabon me darj hai) December 1876 ki 25 tarikh ko wo jurat mand farzand islam paida hua jis me mehkom bareazam hind me bil akhir apni anthak mehnat, gair mamoli zahanat, awami tanzim or hama gir jadujehad se 14 august 1947 mutabiq 27 ramzan Mubarak ko ek azad khud mukhtar mumlikat islamia qaim kar ke dam lya. Karwane milat ke is azimul martabat sipa salar ne December 1913 me Karachi k eek jalse me taqrir karte hue khud farmaya tha k “mujhe be inteha khushi mehsos ho rahi hai k ye wahi shehar hai jahan me paida hua.” 
Bartania me 1913 me jab qaid-e-azam ne (jo abhi mister Muhammad ali Jinnah kehlate the) apna passport banwaya to us me bhi apni jae pedish “Karachi” likhi or tarikh pedasih “25 december 1876” khud darj ki. Pakistan ke qayam se pehle November 1946 karachi me hakumat hind ne qaid ka jo passport banaya us me bhi yahi darj tha yani jae pedaish “Karachi” tarikh padaish 25 december 1876 hai.  

Qaid ki wiladat born

Jinnah ponja pr allah ka karam ye tha k un ke han pehla hi farzand wo paida hua jis ki qismat me mulk or milat ki taqdir sazi likhi thi. Bare azam hind ki huriyat or azadi or musalmaon ki khush nasibiyan khud us ke nasibe me samet aai thi. 
Is bache ki pedaish hi ke waqt se baqol qaid ki ham shirah muhtarma shiren Jinnah gharane ki zaban pr tha k “ye bacha ek din badshah ho ga.” Us waqt yahi samjha gya jesa k har bache ki maa bap or azizon ko arzo hoti hai k un ka bacha bara ho kar bara admi bane balke bare se bara admi ho, or bare se bara admi raja badshah or farma rawa hi samjha jata hai. haqiqatan is ki khabar kis ko thi k qudrat ek din sach much is bache se musalimanan bareazam ki taqdir sazi ki khidmat lene wali hai. ye bacha bara ho ga to mulk or milat ko mehkumi ki qed se nikale ga, azad karae ga, or “be taj badshah” bhi kehlae ga. Ek mumlikat ka bani or farma rawa ho ga. 
Bache ke mammon qasim mosa, aga khan awal ke senior wazir, Mubarak badiyon or duaon ki sogat le kar pohnche or unhon ne apne bhanje ka nam “Muhammad ali” rakha. Jinnah ponja ke gharane me amoman sabiq hindu gharanon ki nasbat namon ke sath raij thi magar ye pehla moqa tha k is bache ka nam khalis islami rakha gya zahiri sabab ye hai k bache ki maa ka khanoada sar zamin iran se taluq rakhta tha. “jetran” gujrati lafz hai is ke maini “duble patle” ke hain. Qaid ke walid charier badan ke the or un ka qad chota tha. Isi munasibat se “jetra” ya jena kehlate the magar un ke andaz ye tagir aya k wo apna nam “jena ponja” ki jaga “Jinnah ponja” likhne lage. Arbi me soti munasibat rakhne wale lafz “Jinnah” ke maini “bazu” or “she par” ke hain. Qaid ke walid ne apne nam ka imla or talafuz badal lya tha. Wo jena ko angrezi me “Jinnah” likhne lage the or unhon ne “ponja ko bhi” “ponjah” kar dya.  

Ibtadai Talim Initial Education

No umar Muhammad ali Jinnah bhai ne apni ibtadai talim 1883 me affiant warnakiolar mission school (desi zabanon ka mission school barae atfal) boltan market se shuru ki jo 1876 me qaim hua tha. Unhon ne wahin se 4th class gujrati ki talim puri ki. 
Qaid ke walid na sirf ek muziz tajir the balke sahibe ilm bhi the or mission school me mulami ki khidmat bhi anjam dete the. Unhon ne angrezi zaban ke charch mission school ke bajae apne bête ko sindh madarsatul islam me dakhla dilwaya. Ye school 1885 me sir syed ke madarsatul alum ali garh ke 10 sal bad qaim hua tha. School me nanhe mune “qaid” ka dakhla 1887 ki 4 july ko angrezi ki pehli jamat me hua. Chand mah wo madarsa chor kar bambai chale gae jahan un ke mamo qasim mosa rehne lage the. Karachi se bambai tak ye samundari safar un ki zindagi ka pehla lamba safar tha or phir sari zindagi safar hi me guzri. Jinnah ponjah ne bhi waha apna ek karobari daftar khol lya tha. 
Bambai me behtar talim ke mawaqa Karachi se yaqinan zyada the. Bambai pohnche to waha un ka dakhla anjuman islam high school ki pehli jamat angrezi me hua magar school ke record se wazah hota hai k wahan un ka qayam chand mahinon se zyada nahi raha. Wo apni walida se dor nahi reh sakte the. Un ko apni maa se behad muhabat thi or un ki maa bhi apne bête ko beinteha chahti thin or pyar se “Muhammad” keh kar pukarti thin. Maa ki yad ne sataya to jald hi Karachi wapas agae or wapsi pr un ka dakhla phir sindh madarsatul islam me 23 december 1887 ko hua. Register me dastakhat ke khane me gujrati me “muhammad” lafz numaya hai. usi register me anjuman islam high school bambai bhi likha hua hai is lye bambai ke kisi or school ka nam likhna durst nahi jesa k boht si kitabon me darj hai. 
Qaid ke walid talim ki ahmiyat ko khob samjhte the. Bambai gae to wahan bhi bête ka fori dakhla karwaya or wapas Karachi aae to yahan bhi dakhla me takhir na ki or talim ko kisi hal me bhi nazar andaz nahi hone dya. Chand hi mahinon ne no umar Muhammad ali Jinnah ne imtehan dya or kamyab ho ka roper ki jamat me pohnch gae. 4th clas tak musalsal talim pate rahe. Phir un ka nam “tawil gair hazri” ki waja se register se kharij ho gya. Ye zamana 1890 ka hai or yahi wo zamana hai jab un ke walid ke karobar ko shaded khasare ka samna hua tha. Mumkin hai is parishani ked or me jab un ke walid zyada tar bahar kid or dhop me mashgol the daftar ki zarori dekh bhal or khat kitabat wagera ke lye bête ko daftar me rehna para ho lekin imtehan ko jab chand mah baqi reh gae to naye sal ke agaz me phir Muhammad ali Jinnah bhai ne school me dakhla le lya imtehan me shirkat ki or bari itminani se intehanat me kamyabi bhi hasil ki. Galiban wo ghar pr apni kitaben parhte rahe hon ge. Wese bhi allah tala ne un ko behtar zehan ata kya tha. Raton ko un ke walid ke doston me se koi mulim un ko parha raha ho ga. Achool se “tawil gair hazri” ke bawajud un ki parhai me kisi qisim ka khalal waqa hone ke asar nahi milte. 
Muhammad ali Jinnah jab 5th class me the jabhi un ke walid ne un ko englistan bhejne ka irada kar lya tha or isi irade ke bad maa ki taraf se israr hua k hamare “Muhammad” ki pehle shadi kar di jae or phir wilayat bheja jae. Is jamat ke imtehanat me bhi chand mah baqi the k shadi ka masla bich me agya. Zahir hai k maa ki tamana aham thi bilkhasus aesi sorat me jabke maa ki sehat bhi achi na thi or un ko ye andesha bhi tha k beta wilayat se koi mem na le aae. Apne “Muhammad” pr mukamal bharosa hone ke bawajud ye us waqt balke ab bhi har maa ke dil ki fitri khatak hai. shadi ho jane ke bad safar englistan se itna andesha na tha. January 1892 ki dastavizat batati hain k Muhammad ali Jinnah bhai school chor kar shadi ke lye “kuch” rawana ho gae. 
Muhammad ali abhi khud puri tarha balog ki umar me nahi pohnche the to zahir hai un ki dulhan or bhi kam umar hon gi. Muhtarma shireen Jinnah farmati hain k “bachpan ki shadi thi or nikah ke bad “amarbi” yani dulhan ki rukhsati nahi hui thi or wo Karachi nahi aai thin.” Nikah ke bad dulha jab Karachi wapis aae to 5th class ke imtehanat khatam ho chuke the or galiban usi madarsa ki usi jamat me dakhil ho kar parhne pr amada nahi hue. Ye bhi aglab hai k Muhammad ali Jinnah ke walid Jinnah ponja ne apne bête ko angrezi mahol se manos karne ke lye charch mission school me talim dilana munasib samjha ho jahan se pehle gurez kya tha. Sindh madarsa ke record se wazah hota hai k qaid ne 5th class me dobara dakhla nahi lya wo mehnati the zahin the or un ke andar khud aetamadi thi is lye unhon ne charch mission high school ka rukh kya. 
Charch mission school ke angrez principle is honehar or zahin talib ilm se itne mutasir hue k unhon ne 8 may 1862 ko 6th class me dakhil kar lya. Is honehar talib ilm ne angrezi me dastakhat kye or apna nam Muhammad ali Jinnah bhai likha. Wazah rahe k pehle sindh madarsatul islam me qomiyat ke khane me un ke nam ke samne “khuja” likha tha lekin charch mission school me pehli bar khud “muhammadan” likhwaya. In dono schools me Muhammad ali Jinnah bhai ka nam puri fees ada karne wale talib ilm ki hesiyat se numaya tor pr darj hai.
Yahan ekwazahat boht zarori hai. wo ye k in dono schools ke register me qaid ki tarikh pedaish 20 october 1875 likhi hui hai.in registers ke aks me ye bat bhi numaya hai k ye register ek muqadma me pesh kye gae the. Jaj ne muqadma no 11, 1896 me apne fesle me likha k “meri rae ye nahi hai k mada alia (Muhammad ali Jinnah bhai) ka October me paida hona maqol shabhat se bala qarar pa kar sabit ho jae. Fazil jaj ki ye rae saf tor pr batati hai k Muhammad ali Jinnah ki tarikh pedaish 20 october qarar dena maqol shabhat se bala har giz nahi tha.ab dosri tarikh 25 december reh jati hai jo qaid ne passport me likhwai. October ki tarikh pr jo shuba jaj ne zahir kyat ha wo yaqinan qaid ke samne bhi tha.isse zahir hai k 25 december 1876 ka amomi andaz se taslim shuda matsor hona bila sabab har giz nahi. Accedmy teqan se qata nazar or muhqiq ki azadi ke bawajud me zati tor pr is fesle ko or is amomi taslim shuda tarikh ko durst samjhta hon. 

Qaid ki farm Farm of quaid

Jinnah ponja ne 1892 ke awail me eknayi farm ki bunyad rakhi jis ka nam unhon ne “masers Muhammad ali Jinnah bhai” rakha or is farm ka malik apne bare bête muhmmad ali jin ko banaya. Ahmed alijinnah abhi sif 6 sal ke the.is farm ne 2500 rupes maliyat ki machliyan englistan bhejin or 10,000 rupes maliyat ki chaina rawana kin.englistan me in raqom ko hasil karne or karobar ki baqaida karwai London me shuru karne ki zimedariyan Muhammad ali ke supurd huin. Chunancha wo jab englistan pohnche to unhon ne raqom wasol kar ke ek hisa apne walid ke pas bheja or baqi khud apni zaroriyat ke lye rakh lya.  

London Rawanngi / Journey of london

Muhammad ali Jinnah bhai ne 31 october 1892 ko charch mission high school ki 6th jamat chori or january1893 me englistan rawana ho hae. Englistan jane ka pura ahtamam kya gya tha. Ek to 7 samundar par ka safar dosre Karachi or London ke mosomon ka farq garam mulk se sard mulk jana tha englistan ki sardi ka hare k ko ilm tha. Englistan me kese libas ki zarorat thi? Is se bhi ye gharana be khabar nahi tha. Yahan to un ka un ke walid ka or dosre ahal shehar jo am libas thaw o bides ke lye mozo nahi samjha ja sakta tha. Bête ki sheet or saholat ke lye waldain ne garam se garam libas tayar tarwae ho ge. Jin ki Karachi jesi mutadal abo hawa me zyada zarorat na thi. Ye bhi mumkin hai k unhon ne dhila dhala pajama or “dagla” jo Karachi ke mosam me pehna jata tha usi libas me bête ko rawana kya ho or ye bhi mumkin hai kangrezi waza ke coat ya overcoat banwae hon. Qarin qayas to yahi hai k is nojawan tajir ko apne riwaiti libas me London ke lye tijarti or tarikhi safar pr rawana kya gya. 
Behre hal is sal englistan me sardi gair mamoli pari thi or mutadal or garam abo hawa ke elaqon se jolog wahan gae the un ke lye ye sal boht parishani ka tha. Muhammad ali daraz qad or boht duble patle the. Sardi bardasht karne ki un me yun bhi salahiyat na thi phir aese thande mulk me wo pehli martaba pohnche the. Yahan bareazam me unhon ne khawah kitne hi karake ki sardi dekhi ho London ki sardi is se kahin barh charh ke thi. Na wahan ke logon se un ke taluqat the balke kisi se bhi wahan un ki waqfiyat na thi. Wahan ki kehar bhi un ke lye bilkul nayi chez thi. Suraj mahinonnazar na ata.  Din me bhi masnoi roshni ki jati. Mosam or mahol insane ka khud bhi bara mualim hai. akhir kar kisi na kisi tarha unhon ne wahan ke mosam or halat se munasibat paida kar li. Tahum un ko ye bat sari umar yad rahi k englistan ki shaded sardi, kehar or na manos fiza ne un ko kitna parishan kya tha. Unhon ne englistan me halat ke taqaze or apni tabiyat ki nifasat pasandi or mulki fashion ke mutabiq behtar se behtar bilas banwae or pehne. bad me to un ki khush poshaki apne mulk me zarbul misil ban gai thi.   
Englistan me no umar Muhammad ali Jinnah ki karobari koshishen in parishaniyon ki waja se nakam rahen jin ka samna Karachi me un ke walid ko karna par raha tha. Yani in maqasid or mashagil ki rah taqriban kat chuki thi jin ke lye wo Karachi se bheje gae the. Unhon ne walid ko likha k mujhe London hi me rehne ki ijazat dijye ta k me yahan qanon ki talim hasil kar lon. Zahir hai k englistan ja kar yun hi wapas ajana bara khasara tha. Chunancha is nojawan tajir ko ek no umar talib ilm ki hesiyat se englistan me rehne ki ijazat mil gai lekin no umar Muhammad ali Jinnah bhai ka jo talimi meyar us waqt tha is ki waja se berestry ki talimi idare me dakhla hasil karna mumkin na tha.lehaza un ko berestry ki talim hasil karne ki ahliyat or darsgah kea hate me qadam rakhne ki salahiyat paida karne ke lye ek ibtadai imtehan dena para. Ye goya dakhle ka imtehan tha. 
Muhammad ali Jinnah bhai metric pas na the.6th me the to charch mission school chor dya.us zamane me metric 10th ko nahi balke 7th ko kehte the. Abhi metric ke mayar talim me 1 ½ sal ki kami thi is lye unhon ne bari mehnat se is ki tayari ki. Ye imtehan may 1893 me hone wala tha or waqt boht kam tha. Unhon ne sal 1 ½ sal ki is talimi kami ko chand hafton me pura kya. Is mukhtasar mudat me un ki lagan azm or hosle ne un ki madad ki, or mehnat bhi khob ki. Tayari ke bad wo is (ibtadai) imtehan me sharik hue or kamyab ho gae. Allah mehnat karne walon ko mehnat ka samar zaror deta hai. yun qaid ki mehnat or zahanat ki ek bari missal hamare samne ati hai. 5 july 1893 ko “linkanzin” me un kodakhla mil gya or register me “Muhammad ali Jinnah bhai” ka nam darj hua. Qaid ke safar englistan ke silsile me aksar kitabon me ye tazkira ata hai k donel shipping company ke ek angrez manager Fredrik kraft ke mashware se Muhammad ali Jinnah ko berestry ke lye englistan bhejne ka fesla Jinnah ponja ne kya tha. Lekin chan bin se malom hua k1890 or us ke bad ke dastawizat me us company me is nam ka kahin ata pata nahi milta is lye munasib hai kis nam ko ab qaid ke tazkire me koi jaga na di jae. Muhammad ali Jinnah bhai ka ye safar englistan aslan qanon ki talim hasil karne ke lye nahi tha balke wo apne walid ke karobar ke silsile me ek maqsad le kar gae the. Jesa k pehle darj hua is maqsad ke lye wahan kaam karne ki koi sorat baqi nahi rahi thi. Agar karobar me kamyabi ho gai hoti to yaqinan un ko ibtada me qanon ki taraf tawaja karne ki fursat na milti or agar wo berestry ki talim ke lye rawana kye jate to metric ki talim mukamal karne ke bad englistan rawana kye jate. Behre hal London me jab fursat hi fursat nazar aai to Muhammad ali Jinnah bhai ne ek bara fesla kya or is ke lye apne walid se ijazat hasil ki. Ab rahi bat k qaid ne qanon hi ki talim hasil karne ka fesla q kya. Wo or koi rah bhi ikhteyar kar sakte the. Ilm ki be shumar rahen un ke lye khuli hui thin. “tasil go” kar ke BA ki talim hasil kr sakte the. Imkanat ko mukhtalif ho sakte hain lekin ek to ye k London rawana hone se pehle shehar Karachi me jo muqadma baziyan unhon ne apne hi gharane or bartanvi gair bartanvi companies or dosre afrad ke darmiyan dekhi thin. in ka asar un ke zehan pr zaror raha ho ga. Phir ye bhi mumkin hai k un ki tabiyat me jo azadi thi us ne un ko is raste pr jane se roka ho jis pr jane ke bad wo kisi ki mulazimat ikhteyar karne pr majbor hote. Azadi ki zindagi basar karne ki ek rah to wahi thi jise tijarat kehte hain jis me khud apni zahanat mehnat or azadana fesle se admi kaam leta hai balke is rah pr apne walid ki pervi me un ke qadam khud bakhud barh chuke the magar karobar ke khasare ne age ka rasta band kar dya. Phir jis London me wo mojud the wahan un ke beshtar hum watan nojawan yani bareazam hind ke mukhtalif shehron or elaqon ke afrad qanon ki talim hasil karne ke lye gae the use milne julne or apne zati mushahide mutale or rujhanat ki bina pr dosri azad rah unko berestry ki nazar aai. Unhon ne mehsos kya k berestry ka pasha aesa hai jo mulazimat ki tamam uljhanon or matehti ki tamam pechidgiyon se pak hai. 
London me berestry ki talim ke lye 4 idare the jin ki “in” kehte the or ab bhi hain. Un ke “linkanz in’ me q dakhla lya? Is ki waja qaid ne khud 25 january 147o sindh bar association karachi me sirat pak pr taqrir karte hue batai hai k “jab main qanon ki talim hasil karne ke lye gya to London ke charo “ins” dikhane ke lye gaide mujhe le kar chala k in me se kisi ek ko apne lye pasand kar lo main “linkanz in” pohncha to wahan mujhe us ki diwar pr ek bari khush rang tehrir or naqosh nazar aae. Main ne pucha k ye kya hai to gaid ne batayak ye “fresco” hai jis me dunya ke tamam bare bare muqnanon (qanon dene walon) ken am darj hain. Main ne pucha k is fehrist me sab se pehle kis ka nam hai gaid ne jawab me kaha. Azim muqanan Muhammad (S.A.W) ka. Bas main ne wahin dakhla lene ka fesla kar lya”. Ye thi qaid ki pegamber islam (S.A.W)b se muhabbat or aqidat ki ek bari missal. 
Muhammad ali Jinnah india council act 1892 ke nafaz ke bad London pohnche the. Usi sal ke wast me dada bhai noroji ki election me kamyabi or bartanvi parliament ke pehle Hindustani rukun muntakhan ho jane se bareazam ke un tulba me bara josh or kharosh tha jo London me muqim the is se qudrati tor pr qaid ko bhi dosre sal London pohnchne pr dilchaspi paida hui. Magar ye kehna durst nahi k muhmmad ali Jinnah bhai ne dada bhai noroji ke election ki meham me hisa lya tha ya London me jab ye election hua tha or darul ulom me dada bhai noroji ne 9 august 1892 ko taqir ki thi to us waqt wo darul ulom ki “visitor gallery” me bethe ye taqrir sun rahe the (jesa k fazil musanif hekter Bolitho ne apni kitab “Jinnah bani Pakistan” me likha hai) us waqt to wp apne Karachi ke charch mission me bethe apne ustad ka lecture sun rahe the.
Muhammad ali Jinnah bhai puri dilchaspi or diljami se berestry ki talim hasil karne me manhamk rahe lekin kabhi kabhi jab walida yad ajatin to afsurda bhi ho jate. Wo un ko bimar chor kar gae the. Muhtarma shiren Jinnah ka bayan hai k wo abhi London hi me the k maa ka inteqal ho gya. Is saneha ki khabar un ko hui to na sirf ye k boht ranjida or gamgin hue balke phot phot kar roe or 1894 ki chutiyon me chand hafton ke lye Karachi aae. Un ke walid ke karobar me aesa khasara hua tha k diwalia ho jane ki nobat agai thi. Qaid jab Karachi se phir London wapas pohnche to unhon ne apne akhrajat ki az sar no mansuba bandi ki or apni jae rehaish bhi tabdil kar li. Ye 1895 ke awail ki bat hai. qaid ne ab nasbatan kam kharch elaqe “kingastan” me aqamat ikhteyar ki jahan Hindustani talib ilmo ko ba kifayat jaga mil jaya karti thi. 35 rasal road London ki is aqamat gah pr county council ne joy ad gari takhti (plak) lagai hai us pr likha hai. “qaid - e – azam Muhammad ali Jinnah bani Pakistan (1876 – 1948) ne is jaga 1895 me qayam kya tha.” Wo us zamane me wahan apni talimi masrofiyat se waqt bacha kar kuch kaam bhi karne lage the or is tarha apni amadni ka zarya bhi talash kar lya tha. Magar kya kaam tha is ki chan bin zarori hai. shekpearin dramatic club me kaam karne ki chand shahadaten mili hai jo mazid tehqiq talab hain. 
Berestry ki talim ke akhir sal Muhammad ali Jinnah bhai ne linkanz in ki council se ye darkhast ki k mera nam ainda “Muhammad ali Jinnah” likha jae or “bhai” ka lafz is se hazf kar dya jae. Un ke walid ne jo farm qaim thi us ka nam bhi “mesers Muhammad ali Jinnah thai” tha or wo Muhammad ali Jinnah bhai ken am se yad kye jate the. Council ne un ki ye darkhast april 1896 ko manzor ki or un ke nam se ye khandani riwaiti lafz bhai hazf kar dya gya. Phir 4 din bad un ka yahi nam berestry ki hesiyat se shaa hua or yun wo Muhammad ali Jinnah ya M A Jinnah ho gae. 
1896 ke wast me jab nojawan berestor Muhammad ali Jinnah apni talim mukamal kar lene ke bad London se watan wapas aae to us waqt tak un ka gharana mali parishaniyon ke sabab Karachi se bambai muntaqil ho chukka tha jahan amarbai ka inteqal ho gya. Wo bhi bambai pohnche or wahan “apolo hotel” me room no 110 karae pr le kar aqamat ikhteyar ki or 24 august 1896 ko high court ke register me nam darj hua. 
Berestry ka pasha bari mehnat or mushaqat or azmaishon ka pasha hai. mahinon balke barson ek berestor ko bagair amadni ke bhi kaam karna parta hai. ye bara sabar azma marhala hota hai or is marhale pr bare tahamul ki zarorat hoti hai. berestor Jinnah ka dil azam or himat or hosle se labrez tha. Behre qimat un ko is rah me kamyab ho kar aage barhna tha. Agarcha kais al tak becheni ser kamyabi ki rah dekhni pari lekin kisi marhale pr bhi us ke hosle me kami nahi aai. Wo London se wapas aae the to is ke lye tayar ho kar aae the. Unhon ne London hi me bari kifayat shari se zindagi basar karna shuru kar di thi or fursat nikal ke jo digar kaam kye the or bachat kit hi wo raqam London se apne sath le kar aae the. Mehnat mushaqat ke is dor me jab un ki koi amadni nahi thi to wahi waqam un ke kaam aai. 
Berestor Jinnah baqaidgi ke sath adalat me bhi jate rahe or apne daftar ya chamber me bhi hama tan mashgol rahe. Un ka chamber fort area me waqa tha jo un ki rehaish gah se koi mile bhar ke fasle pr tha. Wo chamber tak har roz pedal jate the. 1898 ke awakir tak jab un ke halat behtar ho gae to Apollo Bandar k eek flet me muqim ho gae jahan unhon ne ek mulazim bhi rakh lya. Is mulazim ka nam wasant tha. Ye ek achot tha. Qaid ka ye achot mulazim 1940 tak un ke sath raha. Muhtarma shireen Jinnah farmati hain. “wasant ek yad gar character tha. Wo us waqt mulazim hua tha jab bhai jan bilkul nojawan the. Wasant watai anparh tha lekin barson un ke sath rehte rehte itna tarbiyat yafta ho gya tha k wo un ki almari se muqadmat ke zarori kagzat, maslen, brief or hawale ki kitaben tak le ata tha. Wo ye sab kese karta tha hamen to jadu hi lagta tha. Burhape me wasant hamare ghar ka jese ek fard ho gya tha koi shakhs is ko dant nahi sakta tha or hum logon ke mamle me to jo kuch wok eh deta thabas wahi akhiri bat hoti thi. Wasant ne jab burhape ki waja se mulazimat chori to bhai jan ne use chalet waqt boht kuch dya or us ke gao “due” me is ke lye ghar bhi banwaya ye sab us ki tawil shandar khidmat ka sila tha or us ki qadar dani thi. 
Darasal qaid shuru hi se insaniyat ki azmat or logon ki khud dari ke qail the. Ye un ki insane dasti ki missal hai k unhon ne wo sab kuch kya jis ke wo qanonan to paband na the magar ikhlaqi pabandi jo khud un ki taba slim ne un ke zehen or fikar pr aid kar rakhi thi wo sab se bala or aham thi.     
Yahi 1898 hai jab musalmanan bareazam ke bare rehnuma sir syed ahmed khan ka inteqal hua or nojawan berestor Muhammad ali Jinnah ne apni amli zindagi me qadam rakha or phir ahista ahista bari mutanat, zahanat or istehkam ke sath aage barhe. Isi sal nojawan berestor ne bahesiyat qanon dan apne ilmor zahanat ka pehla muzahira is muqadme me kya jo bartanvi company ki taraf se un pr or un ke walid pr dair kya gya tha. Unhon ne apne walid ko qanoni mashware de kar usi sal muqadme ki pervi ke lye Karachi rawana kya or berestor Muhammad ali Jinnah ki qanoni sujh bujh ne bartanvi company ko shikanje me kas lya. Wo is qadar parishan hui k qanoni qanoni giraft se bachne ke lye hazarhan rupee ke dawe or un ki wasoli se dastbardar ho kar sirf chand 100 rupee pr masalehat kar li. Nojawan berestor pr shuru hi se salah pasandi, mufahimat or masalehat ka rujhan galib nazar ata hai jis ka sab se bara namuna usi pehle muqadme me pehli bar samne aya.un ki tabiyat me marat bakhshi mojud thi nez wokisi ki ruswai se lutf andoz hone ke bhi qail na the.
Berestor Muhammad ali Jinnah ko hakumat bambai ne 3 may 1900 ko arzi tor pr presidency ministered muqarar kyat ha. Us zamane me kisi shakhs ka presidency ministered ho jana boht bari bat thi oe wo bhi ek junior berestor ka magar isi sal kam or besh 6 mah bad berestor Jinnah ne ministered ke ohde se aledgi ikhteyar kar li. Un ki tabai huriyat pasandi ka taqaza yahi tha. Phir hakumat ke mehakma qanon ki taraf se mustaqil mulazimat pesh ki gai to unhon ne us ko aqabol na kya.

Yahi qaid ki zindagi ka nuqta inqalab hai.
That is the actually point of view of his lif

Wo agar is shoba zindagi ko qabol kar lete to aage chal kar shayad adalat adlia ke chief justice ban jate. Council ya fedrel court ke kisi ala ohde pr faiz ho jate magar phir unhen dunya ke naqshe pr ek nayi mumlikat islamia ke bani or farman rawa banne ka moqa muyasar na ata. Yahi keh sakte hain k ye qudrat ke khel hain. Jis ne un koaesi aesi mulazimaton ki taraf bhi ragib na hone dya. 
Jis zamane me berestor Jinnah abhi presidency ministered nahi bane the abhi apni berestry ki bunyaden mazbot karne ki jadujehad me masrof the be inteha mehnat or mushaqat kar rahe the or abhi un ki koshishen bar awar nahi hui thi usi zamane me Jinnah ponja ko bête ki shadi kar dene kifikar satane lagi. Bilakhir bête ki rae le kar unhon ne apne baradar nasbati qasim mosa ki sahab zadi Fatima qasim ke lye beretor Jinnah ka pegam bheja. Fatima qasim nojawan berestor kimamon zad behan thin sehat mand, gori chiti, buland bala qad, sunhere bal, bhori ankhen, khubsurat gharane ki khubsurat beti ghar hi me mojud thi lekin qasim mosa ne ye pegam qabol nahi kya. Pegam qabol na karne ke silsile me 2 baten kahi jati hain. Ek to ye k Jinnah ponja ka karobar khatam ho chukka tha. Dosre berestor Jinnah abhi apni wakalat ke ibtadai or kathin marhalon se guzar rahe the. Un ka mustaqbil wazah nahi tha or qasim mosa ki sahab zadi ne dolat or sarwat ki agosh me parwarish pai thi. Wo aese mahol me kese reh sakti thi jahan nazo nam ab baqi nahi raha tha. Dosre lafzon me mashi mushkilat is rishte me are aain. 
Dosri riwayat muhtarma zulekha m h syed ki hai jo qaid ke nanhyali khandan se taluq rakhti hain wo bayan karti hain k”berestor Jinnah ke bare me ye aam khayal tha k wo aga khani maslik se koi taluq nahi rakhte or qasim mosa aga khan ke bare wazir the lehaza dushwari ye pesh aai k wo apni beti ko apne mislik se bahar kese biyah den. Aga khan ke bare wazir hone ki waja se un pr jo zimedariyan aid hoti thin wo un ki rah me is qadar hail huin k wo apne sage bhanje ka pegam apni beti ke lye qabol na kar sake.”
Zyada qarin qayas yahi dosri riwayat nazar ati hai. khud berestor Jinnah ki sari zindagi usi ki shahadat deti hai k wo sirf musalman the or kisi mehdud maslik se apne aap ko wabasta karne pr amada nahi hue. Is inkar se chahe wo mashi mushkilat ki waja se ho ya maslik kibunyad pr nojawan berestor ke dil ko thes zaror pohnchi ho gi. Jis ke bad unhon ne ekarsa tak shadi ka khayal hi nahi kya balke mashi mushkilat ka zabardast muqabla kya or lakhon rupee kamaya or sath hi maslik ke jhamele se bhi hamesha apne aap ko alag rakha. 
Jinnah ponja ki zindagi ki sab se bari zimedari ab ye thi k “rehmat bi” or “maryam bi” 2 bari betiyon ki shadi ho jae or wo in faraiz se sabakdosh ho jaen. Yahi salt ha k sab se bari beti rehmat bi ke lye kalkata ke mashor tajir qasim jamal ka rishta aya jo suni khuja the.jinnah ponja ne rishta ko pasand kya tahum un ko apne susrali halqe ki taraf se kuch maslik ki uljhan ka andesha tha. Is moqa pr nojawan berestor ne bap ke dil ko taqwiyat pohnchai or is rishte ko boht Mubarak qarar dya. Akhir bap ne bête ke mashwara qabol kar ke fesla kya or ye shadi kher or khobi ke sath anjam pa gai.lekin is bat pr Jinnah ponja ke taluqat apni susral walon se bhi khatam ho gae or wo aga khani halqe se bhi alag kar dye gae.
Jinnah ponja ki tabiyat 1902 me zyada kharab rehne lagi to unhon ne apni dosri beti ki shadi bhi apni zindagi me kar deni chahi ta ka ye khushi bhi dekh len or jawan berestor ne bap ki ye khushi bhi puri ki. Unhon ne is shadi ka ahtamam us waqt kya jab Jinnah ponja bister pr par gae the. Unhon ne maryam bi ki shadi bambai ke mashor tajir abdin pir bhai se kar di. Ye bhi suni khuja the. Ye sare fesle berester Jinnah ne kye or puri tawaja se ye sari taqribat khush aslobi ke sath injam dye. 
Jinnah ponja ne 17 april 1902 ko inteqal kya to gharane ki sari zimedariyan barae rast nojawan berestor ke kandhon pr again. Wahi ghar me sab se bare the. Ahmed ali Jinnah shirren Jinnah or Fatima Jinnah ki dekh bhal talim or tarbiyat or shadi biyah ke faraiz sab ahista ahista unhi ne anjam dye. Fatima Jinnah ko bandra canont bording school me talim ke lye dakhil kya. Ahmed ali Jinnah ko anjuman islam me bheja. Shireen Jinnah ki shadi ka masla dar pesh tha is ke sare intezamat kye or sir karim baronet ke gharane me karim jafri bhai se un ki shadi hui jo aga khani the is tarha khandani or gharelo faraiz se faragat pa kar wo apni berestry me hama tan mashgol ho gae or puri yaksoi ke sath kaam karte rahe.

Islami qawanin ka mutala / Study of Islamic rule

Jab Muhammad ali Jinnah apni talib ilmi ke zamane me London me muqim the ye 1894 ki bat hai to previ council k eek fesle ne musalmanon ke lye masla “waqf aliul olad” pr zarb kari lagai thi. Is fesle ke khilaf musalmanon me shaded gam or gusa or hejan tha. Is fesle or us ke qanoni asarat pr qanon ke talib ilm ki hesiyat se Muhammad ali Jinnah ki nazar yaqinan rahi ho gi. Musalmanonke jazbat ki shidat se bhi wo agah the phir wo khud berestor ho kar ubhre to un ki nazar is masle ke nashib or faraz pr rahi ho gi. Unhon ne is ka mazid mutala yaqinan quran or sunat ki roshni me kya ho ga or bad ke waqyat shahid hain k unhon ne ye sab kuch kyat ha. Bambai me unhon ne jab berestry ka agaz kya or un ki qanoni nakta sanjiyan, moshgafiyan or fani barikiyan apne johar dikhane lagin to us ka charcha hone laga. Qaid ne khud farmaya hai k “1902 hi me un ko 2000 rupee se zyada amadni hone lagi thi.” Waqf aliul olad ke masle pr to wo is qadar tayar the k shayad un ko moqa milne kid air thi.

Siyasi or parlimani zindagi / Political and parliamentary life

Waqyat batate hain k 1902 me jab kalkata me congres ka salana ajlas hua to unhen is islami qanon or bartanvi adalati karwai pr izhar khayal ka pura moqa mila tha chunancha unhon ne waqf aliul olad ki tajwiz pr jo taqrir kit hi wo un ki awalin mazhabi or siyasi taqrir thi jo kisi plet form se hui. All india muslim league us waqt tak qaim nahi hui thi us ki bunyad unhi dino 30 december 1902 ko Dhaka me rakhi gai thi.

Muslim education counfrence musalmanon ki sab se bari anjuman mojud to thi magar wo sirf education yani talimi thi. Congress ki hesiyat ek siyasi plet form kit hi or musalmanon ka koi siyasi plet form mojud nahi tha. Aal india national congres ke nam se ek siyasi jamat angrezon ne qaim kit hi or bare bare angrez is ke shuru ke ajlas me sharik bhi hote rahe the balke wahi is ki sadarat bhi karte the or is ki karwai pr puri tawaja rakhte the. Musalmanon ne apne is mazhabi or qanoni masla “waqf aliul olad” ko isi congres ke siyasi plet form pr la kar ye wazah kya k ye masla siyasi bhi hai or is nayi awaz se sara bareazam gonj utha. Is ajlas me nojawan berestor ne “muslim waqf aliul olad” ke elawa qomi “talim” or “self government” yani hakumat khud mukhtari pr bhi aham taqriren kin. In taqriron or un ki shan khatabat or andaz peshkash ne ahal fikar or nazar ki tawaja apni taraf khinchi or har khas or aam me un ka charcha shuru ho gya. 1902 ki is congress ke ijtama ki sadarat dada bhai noroji ne ki thi. Mister “alen octaven hayom” us ke gernal secretary the or unhon ne hi 1885 me congres qaim kit hi or jab se brabar us ke kalide ohde pr faiz chale arahe the. Congres ke joint secretary gopal kirshan ghokhle or d e vocha bhi mojud the berestor Muhammad ali Jinnah ajlas ke rehnumaon me sab se kam umar the or un ki umar thek 30 sal ki thi wo us dor ke umar rasida jahandida or manjhe hue siyasat danon ki sif me pehli martaba dekhe gae the. Yun to wo apni siyasi zindagi ke agaz hi se sif awal me nazar aae tahum un ki shan or shokat or zehni or fikri imteyaz ke phelo isi plet form pr awal awal kalkata me numayan hue.